Аморим со добра најава: Големото летно засилување конечно може да дебитира

Манчестер Јунајтед го победи Евертон со 4:0 и на најдобар можен начин се подготвува за големото дерби кое следи, дуелот со разиграниот Арсенал на „Емирејтс“.

„Топчиите“ постигнаа 13 голови на последните три меча и во извонредно расположение го пречекуваат тимот кој од неодамна го води Рубен Аморим, тренер кој за дербито нема да може да смета на двајца стартери.

Лисандро Мартинез и Коби Маино сами се претцртаа со жолтите картони кои ги добија против Евертон, но Аморим по се изгледа добива нова опција во дефанзивата, откако Лени Јоро конечно е во ситуација да размислува за деби.

Големото летно засилување заработи непријатна повреда на метатарзалната коска за време на летната пресезона, па до овој момент нема дебитирано на официјален натпревар за Јунајтед.

Тоа може да се промени утре против Арсенал, нешто што беше најавено и од Аморим при обраќањето пред новинарите.

– Имаме уште една важна тренинг сесија пред нас, но многу веројатно е дека Јоро ќе биде во тимот. Чувствувам дека е во добар момент, фитнесот му е се подобар и мислам дека ќе биде дел од тимот кој ќе отпатува во Лондон.

– Не сме имале многу тренинзи заедно, тој тренираше со мала група на луѓе во последно време, но од тоа што го видовме, тој е многу брз и модерен дефанзивец кој е извонреден за вршење пресинг. Сметам дека се работи за специјален талент, но ќе мора да бидеме внимателни со него после повредата, – изјави Аморим, најавувајќи дека сепак ќе го дозира Јоро во оваа почетна фаза по санирањето на повредата.