Аморим откри каква кратка порака добил од Фергусон при средбата на теренот

Манчестер Јунајтед вчера како клуб му оддаде последна почест на легендарниот Денис Лоу кој почина на крајот на минатата седмица, па тоа натера многу звучни имиња да се појават на „Олд Трафорд“ пред првиот судиски свиреж.

На теренот се најде и неповторливиот Сер Алекс Фергусон кој беше дел од церемонијата посветена на незаборавниот Шкотланѓанец, а краткиот излет во близина на Рубен Аморим го искористил за да му испрати една кратка и едноставна порака на менаџерот.

Португалецот брзо почна да го чувствува жестокиот притисок како менаџер на Јунајтед, па покрај тоа што говореше дека овој негов тим можеби е најлош во историјата на Манчестер Јунајтед, по поразот од Брајтон откри детали и од кратката конверзација која ја имал со Ферги.

– Остани позитивен, – беа зборовите кои ми ги испрати Фергусон на теренот……

– Имам зборувано со Сер Алекс во повеќе наврати, кога зборувате со него, ја чувствувате историјата на клубот. Тешко е да се биде менаџер на тимот во овој момент, но мора да веруваме во тоа што го правиме и да останеме позитивни, – вели Аморим.