Алкарас подели неверојатни комплименти за Ѓоковиќ: Пробав да се борам со него, но……

Карлос Алкарас дебитираше на завршниот Мастерс на кој играат најдобрите осум тенисери и првиот меч нема да го памети по добро, бидејќи Александер Зверев му нанесе прв пораз во „црвената група“.

На денот кога Алкарас мораше да се помири со пресврт на Германецот, Новак Ѓоковиќ по осми пат во кариерата го подигна трофејот за најдобар тенисер во годината, трка која овојпат ја доби токму со младиот ривал од Шпанија.

Карлос не можеше да го следи темпото на Ноле во завршните неколку месеци и на крајот ќе се задоволи со второто место, па по поразот од Саша мораше да го коментира новото историско достигнување на Србинот.

– Нема дилеми дали Ноле заслужи или не. Секако дека заслужи да биде прв на крајот од годината. Освои три од четирите грен слем турнири и играше едно финале. Загуби само пет меча цела сезона, тоа што го прави е неверојатно. Слушнав дека кажал дека и покрај се, ова не е идеална сезона за него. Навистина е импресивно како размислува.

– Се борев со него за првото место и имав шанса на турнирите кои ги играв оваа есен, но не го искористив тоа. Се што можам да направам е да му честитам. Осми пат во кариерата ја заврши годината како најдобар на светот, тоа е неверојатно. Јас ќе се обидам повторно, следната година ќе се борам за такво достигнување, – изјави Алкарас.