Академија ФМП го победи Феникс и изби на третото место на табелата

Неделната кошаркарска вечер во Првата македонска лига беше затворена со мечот меѓу Академија ФМП и Феникс 2010, средба на која не видовме преголема неизвесност и по која стана јасно дека „академците“ ќе презимат зад водечките Пелистер и МЗТ Скопје.

Фантастичната шутерска игра и 17-те погодени тројки од 32 обиди ја направија главната разлика на натпреварот кој се одигра вечерва, па на стартот на третата четвртина стана јасно дека победата ќе остане на домашен терен.

Предноста од 21 поен разлика беше пресигурна за да се направи било какво изненадување, без оглед на тоа што Феникс во еден момент стигна до минус 12.

„Академците“ се вратија во сигурна зона во четвртиот период и само ја потврдија победата со конечни 95:75, триумф со кој си го загарантираа третото место на табелата пред паузата која следи.

Натпреварувачката 2021-ва утре ќе биде затворена со големо дерби, во кое силите ќе ги одмерат најдобрите два тима во првиот дел од сезоната, МЗТ Скопје и Пелистер.