Вардар им се врати на победите, Охрид ја прекина негативната серија

Актуелниот македонски ракометен шампион Вардар им се врати на победите во домашното првенство, а денеска оствари рутинска победа во дуелот со Тиквеш (34:27).

По киксот во Битола, „вардарци“ не дозволија неизвесност во дуелот со Тиквеш и уште на полувреме водеа со 18:13, за во вториот дел дополнително да ја зголемат позитивата.

Дибиров со 11 голови се издвоил во однос на сите актери на теренот, додека во редовите на Тиквеш, со 6 голови најдобар реализатор бил Темелкоски.

Охрид ја прекина серијата без победа, триумфирајќи против Прилеп со убедливи 33:21, додека Еурофарм Пелистер 2 и Струга обезбедија гостински победи.

Вториот тим на Еурофарм славеше кај Радовиш (24:29), додека Струга се враќа со победа од главниот град, каде го совлада Скопје со 29:32.

Вечерва во скопското дерби, Бутел го пречекува Металург, а интересен ќе биде и утрешниот натпревар меѓу Еурофарм Пелистер и Тинекс Пролет.