Трофеен црногорски тренер седнува на клупата на Црвена Звезда

Кошаркарскиот клуб Црвена Звезда реши да направи промена на тренерската позиција и да ја прекине соработкатаа со досегашниот кормилар – Владимир Јовановиќ.

Српските медиуми пренесуваат дека клубот веќе се договорил со неговиот наследник, а се работи за искусниот Душко Ивановиќ.

Црногорскиот стручњак е запаметен како играчка легенда на Југопластика, а подоцна и како трофеен тренер кој последно работеше во шпанска Басконија. Последниот голем успех му беше освојувањето на шпанското првенство во 2020 година токму со Басконија.

Ивановиќ е повеќе од авторитет на европската кошаркарска сцена и Црвена Звезда очекува подобри перформанси на екипата во продолжението од Евролигата.

Под водство на Јовановиќ, „црвено-белите“ стигнаа до само една победа во Евролигата, а доживеаја и неочекуван пораз од Задар во АБА.