Сочи немаше милост за „децата“ на Ростов и постави нов руски рекорд

Руското фудбалско првенство денеска продолжи по паузата поради коронавирусот, а уште првиот ден е одигран еден бизарен натпревар.

Сочи го победи Ростов со 10:1, откако гостите настапуваа со младинска екипа со просечна возраст од 17 години, а и покрај тоа домаќините ги славеле головите еуфорично.

Причина за ваквиот епилог е што пред неколку дена дури шест фудбалери на Ростов беа позитивни на коронавирусот, па целиот прв тим заврши во карантин.

Екипата бараше одложување на натпреварот, но откако федерацијата не дозволи такво нешто, Ростов мораше да игра со младинска екипа.

Воедно, ова е нов рекорд за највисока победа во руската лига, откако досега највисок триумф беше тој на Локомотив против Урал (9:0) од 2000 година.