Снукер федерацијата лиценцираше шест нови тренери

Снукерот е еден од спортовите кој наиде на одличен прием кај македонската јавноста и по формирањето на соодветната федерација успешно се развива од година во година.

Денеска беше споделена вест дека по 2021 година, организирана е првата обука и лиценцирање на тренери за снукер.

– Еден од најбитните фактори за развој на секој спорт во Македонија е тренерскиот капацитет со кој располагаме и кој треба да вроди нов потенцијал на спортски надежи, а воедно да се изврши подигање на нивото и квалитетот на постојаните активни спортисти,– се вели во објавата.

Нотирано е дека федерацијата ги увидела сигналите кои ја креирале ваквата потреба за нови тренери, а тоа се зголемување на бројот на снукер маси низ државата, зголемувањето на интересот за тренирање кај нови снукер играчи, како и активното учество на нашите репрезентативци и неодамнешните успеси на отворенирте меѓународни турнири и Европското првенство.

– Двата викенд дена зад нас, на 22 и на 23 март, буквално од утринските до доцните часови, максимално беа искористени за држење на теоретски и практични предавања за техниките и фундаментите на снукерот, за на крајот да завршат со успешни положени тестови од сите шест кандидати,– соопшти Снукер федерацијата.

Новите национални тренери од класта 2025година кои се здобија со формални и практично знаење и со лиценца за тренери по снукер се:

1. Филип Нешкоски БСК Гранклуб – Скопје

2. Дане Тодоровски БСК Гранклуб – Скопје

3. Мартин Петрушевски БСК Гранклуб – Скопје

4. Кристијан Бојчовски БСК Гранклуб – Скопје

5. Сашко Каланоски Гранклуб – Охрид

6. Филип Каланоски Гранклуб – Охрид

Комплетниот настан беше организиран во соработка со Билјард Федерацијата, и паралено се организираше и обука и лиценцирање на билјард тренери на кој дополнително имаше кандидати и успешно го завршија курсот за нови национални тренери од различни краеви на Македонија.

Целиот настан беше воден под диригентска палка на ЕБСА меѓународниот тренер Лазар Лазаревски, со асистенција на националните и веќе искусни тренери Горан Ѓурчиновски и Петар Панов.

Ова е трет настан оваа година што доаѓа од снукер заедницата, откако се одигра Првиот турнир од новото национално првенство, а потоа младинците Марко и Теодор Величковски имаа забележителен настап на Европското првенство во Турција.