Словенците го обвинија домаќинот за труење со храна, Данците им посочија дека сами ги прекршиле правилата

Словенија не успеа да обезбеди четвртфинале на Светското првенство во Египет, а по вчерашниот пораз од домаќините, од таборот на Словенија стигнаа сериозни обвиненија на сметка на организаторите.

Неколку словенечки репрезентативци имаа стомачен вирус и не можеа да го одиграат клучниот натпревар со Египет, што за поразената селекција беше доволно да се обвини домаќинот дека имало труење со храната во хотелот, при што 12 ракометари имале исти симптоми.

Неочекувано, реакција пристигна од данската делегација, поточно од спортскиот директор Мортен Хенриксен кој имаше што да им порача на Словенците.

– Малку е комично да се слушаат вакви обвинувања, а Словенците нарачуваа пица од локал надвор од хотелот. Имаме и фотографии како поткрепа на тврдењето.

– Исто така знаеме дека не се плашеа да експериментираат со храната во хотелот, многу тимови имаат проблем со стомачниот вирус, очигледно има повеќе причини за ваквата ситуација. И репрезентации кои не играа против Египет имаа вакви проблеми, треба да останеме присебни и да им веруваме на домаќините дека и натаму ќе се трудат да обезбедат добри услови и посакувана хигиена, – изјавил Хенриксен.