Скопски маратон 2022: Кенијци на врвот, втори места за Ивановски и Кираџиева

Кениските маратонци очекувано ја оправдаа фаворитската улога на новото издание на Скопскиот маратон, кое денеска се одржа низ улиците на главниот град.

Онезмус Киплагат и Катерин Черотич победија во машка, односно женска конкуренција, со голема предност во однос на ривалите, а најдобри македонски претставници беа Дарио Ивановски и Билјана Кираџиева, кои го освоија второто место во својата конкуренција.

Киплагат го истрча маратонот за 2:18:19 часа, Ивановски стигна на целта за 2:23:07 часа, додека третото место му припадна на уште еден македонски претставник, односно Никола Илиевски.

Под границата од 3 часа, маратонот го истрчаа уште неколку македонски претставници, односно Миле Бачески, Марјан Бонев, Кокан Ајановски, Игор Јакимовски и Александар Милески, кои се пласираа до осмото место.

Кај маратонките, Черотич победи со време 2:38:48 часа, додека Кираџиева имаше време 3:04:29. Победничкиот пиедестал го комплетираше Тамара Попов.