Салах постави нов престижен рекорд во Премиер лигата

Мохамед Салах одигра уште еден маестрален натпревар во дресот на Ливерпул, инспирирајќи ја својата екипа да стигне до убедлива победа над Вест Хем и да ја заврши годината во висок стил.

Египетскиот интернационалец постигна еден гол, но забележа и две асистенции, а овие бројки му овозможија да постави премиерлигашки рекорд во однос на ефект за една сезона, иако до крајот на истата има уште многу натпревари.

Дуелот во Лондон беше осми сезонава на кој Салах имал по барем еден гол и асистенција, со што постави престижен рекорд, оставајќи зад себе голем број легендарни играчи.

На Алан Ширер тоа му успеало седум пати во сезоната 1994/95, а неговиот тогашен рекорд подоцна го израмнија и Тјери Анри, Робин ван Перси, Хари Кејн и Бруно Фернандеш.

Кејн и Фернандеш имаа таков ефект во сезоната 2020/21, а сега Салах се издвои со осум натпревари и голема шанса да го подобри ефектот и да постави резултат кој тешко ќе биде достигнат во скоро време.