Поранешен германски репрезентативец предизвика скандал поради коментарот по повредата на Адеми

Телевизиските коментатори и нивните стручни соработници мора да бидат многу внимателни во однос на она што ќе го кажат за време на преносите, бидејќи секој погрешен збор може да им донесе осуда од пошироката јавност.

Тоа се случи со поранешниот германски репрезентативец, Штефан Фројнд, кој коментирајќи го натпреварот меѓу Македонија и Германија за „РТЛ“ си заработи обвинение за сексизам.

Фројнд ја коментирал повредата на нашиот репрезентативец Аријан Адеми, потенцирајќи дека „жените не треба да ја гледаат повторената снимка“, по што доби многу критики на социјалните мрежи.

– Боли и кога само се гледа вакво нешто. Жени во своите домови, не ја гледајте повторената снимка, рекол Фројнд, по што започна лавината критики, но и коментари од фанови кои велат дека јавноста претерува со своите забелешки на сметка на некогашниот фудбалер.

Фројнд подоцна дал објаснување за своите зборови.

– Кога Адеми се повреди, јас прво помислив на мојата сопруга за која знам дека, исто како мене, тешко би го поднела она што се гледаше на успорената снимка. Се надевам дека не се работи за тешка повреда и му пожелувам на Адеми брзо да се врати на терените, – изјавил Фројнд.