Полицијата му запленила скап спортски автомобил на фудбалер на Челси

Челси вчера имаше настап во четвртфиналето на Конференциската лига, но еден од фудбалерите на премиерлигашите беше главна вест на страниците на таблоидите.

Се работи за Моисес Каиседо, кој стана топ тема откако полицијата соопшти дека стопирала возач кој управувал автомобил без соодветна дозвола во близина на тренинг центарот на Челси, а таблоидите открија дека се работи за еквадорскиот интернационалец.

Каиседо допрва ќе дознае каква казна ќе добие од правосудниот систем поради тешкиот прекршок, но полицијата веднаш му го запленила и скапиот автомобил кој го управувал.

Се работи за Ауди РС Ку8, автомобил чија цена надминува 150.000 евра и кој сега ќе биде дел од соодветните процедури за запленување на возилата на возачите кои не ги почитуваат најважните правила.

Каиседо е во Англија од 2021 година кога потпиша за Брајтон, за две години подоцна да дојде во Челси во трансфер вреден над 100 милиони евра.