Наполи ќе го испрати Осимен во Челси во размена за двајца фудбалери и солидна сума

Виктор Осимен одамна им предочил на првите луѓе на Наполи дека летово сака да ја промени средината, но барем засега нигерискиот голгетер останува во Неапол и очекува некаков конкретен потег од неговите агенти и заинтересираните клубови.

Во таква ситуација, Наполи размислува за негов наследник, но и најдобар начин за збогување со Осимен, а тренерот Антонио Конте побарал двајца играчи на Челси, плус солидна сума, за напаѓачот да се пресели во редовите на премиерлигашот.

Конте сака да го размени Осимен за Ромелу Лукаку и Чезаре Касадеи, двајца фудбалери кои не се во плановите на менаџерот Енцо Мареска, а дополнително Челси да плати и 39 милиони фунти во овој дил.

Предводникот на Наполи е убеден дека шампионот од сезоната 2022/23 на ваков начин ќе добие квалитетни засилувања и буџет за дополнителни трансфери, а спортскиот директор Џовани Мана веќе е во Лондон за да ги комплетира преговорите.

Паралелно со преговорите со Челси, Мана и неговиот тим се обидуваат да го обезбедат потписот и на Скот МекТоминеј и Били Гилмур, шкотските репрезентативци кои би можеле да го засилат средниот ред на Наполи.