Миркуловски промовиран како координатор на машките ракометни репрезентации

Поранешниот македонски репрезентативец, Филип Миркуловски, денеска официјално е претставен како нов координатор на машките ракометни селекции.

По долгодишниот престој во Германија, Миркуловски се враќа во Македонија откако ја прифати понудата на РФМ и ќе се обиде да го искористи своето искуство да им помогне на националните тимови во сите категории.

Миркуловски ќе ја преземе функцијата од Влатко Тасевски, кој пак ќе биде генерален секретар на федерацијата, a денеска беше претставен на официјална прес-конференција.

– Благодарен сум што раководството на РФМ ми укажа ваква доверба за да преземам една витална функција.

– Подготвен сум да го искористам своето знаење стекнато овие години во Германија, а моја примарна цел ќе биде развојот на младинските категории и координација на селекторите во сите категории.

– Мора да изградиме единствен систем и да ја подобриме комуникацијата, со што ќе го олесниме работењето и во сениорската репрезентација, – истакна Миркуловски.