Матеус: Баерн досега беше шоу на еден човек кој направи раздор во соблекувалната

Баерн Минхен ја отвора новата сезона во Бундеслигата под водство на Венсан Компани, а легендарниот Лотар Матеус смета дека Баварците ќе се вратат на освојување трофеи, а со тоа и еден Хари Кејн ќе може конечно да се израдува на трофеј во својата кариера.

Поранешната ѕвезда на Баерн потенцира дека главниот проблем на клубот бил претходниот тренер Томас Тухел, кој имал негативно влијание врз соблекувалната и ја уништил самодовербата кај најважните играчи на екипата.

– Последните две години Баерн Минхен не беше фамилија, туку шоу на еден човек, а тој човек беше Томас Тухел.

– Тој е добар тренер, но не е за во Баерн. Атмосферата не беше добра, затоа што кога во соблекувалната имате трофејни играчи како Кимих и Горецка, а вие јавно велите дека барате нова „шестка“, испраќате порака до фудбалерите дека не се доволно добри. Секој од таквите играчи си велеше дека освоил толку многу трофеи во Германија, ја освоил Лигата на шампионите, а сега не е доволно добар за Тухел. Тренерот загуби многу важни играчи и тоа се почувствува на теренот.

– Компани ја познава Бундеслигата, го знае јазикот, за да работиш во Баерн треба да го разбереш и менталитетот. Според мене, Баерн и Баер Леверкузен имаат слични шанси за титулата, но јас мислам дека таа ќе заврши во редовите на Баерн, – рекол Матеус.

Германецот искоментирал и што очекува од Кејн, кој минатата сезона постигна 36 голови, но повторно не освои трофеј.

– Кејн нема повторно да постигне толку голови, но веројатно тоа нема ни да биде потребно. Новиот тренер ќе биде дополнителна мотивација за него и ќе се надева на подобар епилог, – вели германската легенда.