Македонските ракометарки минимално поразени од Норвешка

Македонската женска ракометна репрезентација доживеа пораз на контролниот натпревар со Б репрезентацијата на Норвешка (26:27), кој денеска е одигран зад затворени врати.

Избраничките на селекторот Љубомир Савевски се подготвуваат за претстојното Европско првенство, а денеска одиграле подобро прво полувреме во кое имале водство со резултат 17:14.

Норвежанките ја презеле иницијативата во вториот дел и се вратија во игра за победа, а триумфот го обезбедиле со погодок во последните секунди за конечни 26:27 во Скопје.

Двете селекции ќе одиграат уште еден пријателски натпревар и тоа во сабота, а на него ќе може да присуствуваат и навивачи.

Европското првенство започнува на 4. ноември, а заедно со Македонија, домаќини се Црна Гора и Словенија.