Ливерпул потврди разделба со двајца фудбалери

Заминувањето на Јирген Клоп и неговиот стручен штаб нема да биде единствената промена во таборот на Ливерпул, клуб кој денеска потврди разделба и со двајца фудбалери.

Ако се тргнат настрана шпекулациите за заминување на Мохамед Салах и дел од поголемите ѕвезди, од денеска е сигурно дека во екипата следната сезона нема да бидат Жоел Матип и Тиаго Алкантара.

Ливерпул официјално потврди дека Матип и Тиаго заминуваат, а ваквото сценарио се реализира откако и двајцата последната сезона имаа проблеми со повреди и мал број настапи.

Тиаго паузираше шест месеци и се врати во февруари, по што заработи нова повреда и не се врати во тимот, додека Матип ги скина лигаментите на коленото на дуелот со Фулам во декември.

Шпанскиот фудбалер пристигна во Ливерпул од Баерн во 2020 година, додека Матип дојде исто така од Германија (Шалке 04), но во 2016 година.