Кин: Агентот на Роналдо заборавил да вметне важна клаузула во договорот

Ситуацијата со Кристијано Роналдо и Манчестер Јунајтед се уште не е целосно разрешена, а притисокот станува се поголем поради фактот што викендов почнува и новата сезона во Премиер лигата.

Португалецот веќе побара од клубот да му дозволи да замине доколку биде испратена соодветна понуда, а главен мотив за ваков потег е фактот што оваа екипа нема да игра во Лигата на шампионите.

Рој Кин како поранешен капитен на Јунајтед не сака премногу да го критикува Португалецот, но смета дека неговиот супер агент морал да биде повнимателен склучувајќи го договорот минатото лето.

– Зошто неговиот агент не вметнал клаузула дека двете страни ќе може повторно да преговараат ако Јунајтед не избори место во Лигата на шампионите? Ако тврдите дека имате супер агент кој обезбедува фантастични договори за своите клиенти, зошто пропуштил такво нешто во договорот на Роналдо? – прашува Кин.

Ирецот смета дека Роналдо може да стана компликација за тимот, ако Јунајтед нема добри резултати на почетокот на сезоната.

– Не верувам дека Кристијано прави големи проблеми во позадина, а менаџерот е свесен дека секогаш има проблеми и мислам дека ќе успее да се носи со тоа.

– Моите стравувања се само ако Јунајтед не започне добро и ако тој покажува огорченост од менаџерот, тогаш може да биде лошо. Голем проблем за егото и брендот на Роналдо е веќе фактот што не играат во ЛШ, – коментирал Кин.