Јувентус направи пресврт и ги освои бодовите против Лацио (Видео)

Лацио имаше водство на „Алијанц“ арената во Торино, но Јувентус успеа да направи пресврт на дербито и стигна до победа со резултат 3:1.

Домаќините започнаа без Кристијано Роналдо во првите единаесет, а големата грешка на Кулушевски донесе погодок за Кореја во 14. минута и рано водство на гостите од Рим.

Јувентус заигра поангажирано, па откако Лацио не искористи уште една шанса, дојде и израмнувањето со атрактивен погодок на Рабио во 39. минута од средбата.

Иницијативата на „бјанконерите“ навестуваше желба за целосен пресврт, а по една пресечена топка, Киеза убаво го проигра Мората, а Шпанецот успеа да го совлада Рејна.

Три минути подоцна, Мората доби шанса за втор гол, овој пат од пенал, откако Милинковиќ-Савиќ направи прекршок над Ремзи, а напаѓачот на Јувентус ги постави конечните 3:1.

Јувентус стигна до 52 бодови, додека Лацио останува на 43, што значи трето, односно седмо место за денешните противници.