Игокеа се пофали со потписот на талентираниот Луканоски

Кошаркарскиот клуб Игокеа денеска потврди дека Марко Луканоски е нов член на јуниорскиот тим на овој клуб.

Талентираниот македонски кошаркар се сели во клубот од Босна и Херцеговина и ќе настапува во јуниорската регионална АБА лига и уште неколку натпреварувања, што ќе биде добра можност за него за дополнителен развој и напредок во кариерата.

Луканоски е центар кој настапуваше за македонската У-18 репрезентација, која неодамна триумфираше на Европското првенство Б дивизија кое се играше во Скопје.

Македонецот беше избран и во идеалната петорка на првенството, а со своите настапи го привлече вниманието на скаутите.

Луканоски досега беше член на Вардар, а со Игокеа потпишал повеќегодишен договор.