Хумелс прифатил едногодишна соработка со Рома

Рома веќе го потврди Марио Ермосо како големо засилување во одбраната, а италијанските медиуми тврдат дека истото ќе се случи со уште еден дефанзивец без клуб.

Се работи за Матс Хумелс, кој ја заврши соработката со Борусија Дортмунд и сега е слободен агент, а наводно веќе договорил соработка за една сезона со италијанскиот клуб.

Рома во овој преоден рок го испрати Крис Смолинг во Саудиска Арабија, а го надградува тимот со двајца одлични стопери, од кои Хумелс дефинитивно има многу поголемо искуство.

Германецот веројатно уште утре ќе допатува за да ги помине лекарските прегледи, по што и официјално ќе стави потпис на договорот со неговиот нов клуб.

Италијанските медиуми шпекулираат дека за едногодишната соработка, 35-годишниот Хумелс ќе заработи 3 милиони евра.