Главните кандидати за купување на Манчестер Јунајтед не испратиле втори понуди

Навивачите на Манчестер Јунајтед со нетрпение го очекуваат епилогот од обидот за продажба на клубот од страна на актуелните сопственици, фамилијата Глејзер, но за такво нешто ќе мора да почекаат уште најмалку два дена.

Вчерашниот ден беше најавен како последен во кој заинтересираните страни требаше да испратат ревидирани понуди, но организаторот на процесот решил да го продолжи рокот за нови 48 часа.

Ваквиот потег внесе немир меѓу фановите, на кои не им се допаѓа најавата дека во последен момент може да се уфрли некоја понуда, која би значела и инвестиција на моќни фондови, чиј главен мотив е профит и евентуална препродажба, па дури и задржување на Глејзерови во сопственичката структура.

Во меѓувреме, милијардерот Џим Ретклиф и Шеикот Јасим Бил Хамад Ал Тани ги одложиле, односно повлекле своите понуди откако дознале за новата ситуација, тврди таблоидот „Сан“.

И Ретклиф и катарскиот шеик се големи фанови на Јунајтед и беа подготвени да платат околу 5 милијарди фунти за клубот, а најголем број медиуми тврдат дека не успеале да испратат втори понуди во предвидениот рок.

Останува неизвесно дали рокот е продолжен поради тоа, или пак како што тврди „Сан“, на барање на банката која го менаџира процесот, а која добила најава и за други понуди.