Докторите потврдија дека Ѕанарди е итно опериран и е во животна опасност

Алекс Ѕанарди завршил на итна операција во болницата каде е одведен по несреќата која ја доживеа со својот „хендбајк“ за време на организиран натпревар со други параолимпијци во својата Италија.

Докторите утврдиле сериозни повреди на главата кај поранешниот Формула 1 возач и тој веднаш бил опериран, по што сега е на интензивна нега и во животна опасност.

Ова е само потврда на првичните информации од очевидците, иако Ѕанарди бил свесен кога пристигнал медицинскиот тим, очигледно има сериозни повреди на главата, причинети од ударот кој го заработил од камион кој минувал на делницата во близина на Сиена.

Во меѓувреме, голем број италијански спортисти и јавни личности изразија поддршка за Ѕанарди, потенцирајќи ја неговата важна улога на голем спортски борец и мотиватор за помладите и параолимпијците.

Ѕанарди ги загуби двете нозе под колената за време на трка од „Чемп Кар“ (сегашна Инди Кар) серијата, во која има две титули, откако имаше сериозна несреќа во 2001 година.

Во меѓувреме, тој почна да настапува на Параолимпијадите, каде веќе освои четири златни медали во велосипедизам.