Аземи освои бронзен медал на ЕП во бокс во Будва

Македонскиот боксер Ардијан Аземи го постигна најголемиот успех во досегашната кариера, освојувајќи бронзен медал на Европското првенство за младинци кое се одржа во Будва, Црна Гора.

Аземи настапи во категоријата до 91 килограм и успеа да си обезбеди место на победничкиот пиедестал, со што најави успешна боксерска кариера.

Нашиот боксер стигна до полуфиналето на ЕП, каде загуби со 3:2 во дуелот со рускиот ривал Владислав Комаров.

За Македонија ова е прв медал во младинска конкуренција по 1995 година, последен пат до медал на континенталниот шампионат стигна Примислав Димовски кој исто така освои бронза на ЕП во Турција.

Токму Димовски, како актуелен претседател на Боксерската федерација имаше можност да учествува на церемонијата на доделување на медали во категоријата на Аземи.