Аталанта ќе го менува Скамака со поранешна „деветка“ на Манчестер Јунајтед

Џанлука Скамака заработи незгодна и сериозна повреда непосредно пред почетокот на новата сезона, оставајќи ја Аталанта без својата прва ѕвезда во нападот.

Италијанскиот репрезентативец се повреди пред неколку дена и Аталанта веќе е во потрага по замена во овој преоден рок, за сега како главен фаворит да се појави поранешен играч на Манчестер Јунајтед.

Довчерашниот сопственик на „деветката“ на Јунајтед, Антони Марсијал, бил предложен на Аталанта како опција за нападот и фудбалер кој би се обидел да потсети на својот потенцијал во Серија А.

Марсијал е без клуб откако му заврши договорот со Јунајтед, кој не ни размислуваше за евентуално продолжување на соработката, а претходно беше поврзуван со враќање во својата Франција.

Претходното лето, Аталанта го собори клупскиот трансфер рекорд за Ел Билал Туре од Алмерија, но репрезентативецот на Мали се повреди пред почетокот на сезоната и ја пропушти првата половина од неа. Туре веќе не е фаворит кај тренерот Гасперини и Аталанта сака да го продаде во Штутгарт и покрај ситуацијата со Скамака.