Астон Вила се пофали со продолжување на договорот на клучен фудбалер

Доаѓањето на Унај Емери во Астон Вила донесе пресврт во однос на резултатите кои ги постигнува екипата, а за тоа подеднакво заслужни се и фудбалерите на тимот од Бирмингем.

Еден од оние кои најмногу се истакнуваат последните две сезони е Оли Воткинс, а Астон Вила денеска се пофали со продолжувањето на договорот со својот клучен играч.

Напаѓачот имаше договор до 2025 година, но сега ќе има обврски кон Вила до 2028 година, за што ќе добие и договор со многу подобри финансиски услови.

Воткинс дебитираше за англиската репрезентација во 2021 година, а со добрата форма на последните натпревари заработи и нов повик од Герет Саутгејт, за дуелите против Австралија и Италија планирани за овој месец.

Воткинс дојде во Вила од Брентфорд за тогаш рекордни за клубот 28 милиони фунти и веќе постигна 50 голови на 127 натпревари.