Аргентина без Меси против Чиле и Колумбија

Името на Лионел Меси го нема на проширениот список на селекторот на Аргентина, Лионел Скалони за натпреварите против Чиле и Колумбија во квалификациите за СП 2026 година во Канада, Мексико и САД.

Сега веќе легендарниот 37-годишен фудбалер се уште не се опоравил од повредата заработена во финалето на Копа Америка пред нешто повеќе од еден месец против Колумбија во Мајами.

Во тимот го нема ни голманот Франко Армани, ниту пак дефанзивецот Маркос Акуна. За место по левата страна ќе се борат Николас Таљафико и Валентин Барко.

Меѓу поканетите ги нема играчот од средниот ред Езквиел Паласиос, кој исто така се опоравува од повредата и Пауло Дибала. Се шпекулира дека крилниот напаѓач би можел да ја напушти Рома, а ден претходно не беше стартер на гостувањето кај Каљари кое заврши без голови.

„Гаучосите“ водат во јужноамериканските квалификации со 15 бода, два повеќе од Уругвај и три од Колумбија, по шест одиграни натпревари. Актуелните светски прваци го пречекуваат Чиле ноќта меѓу 5 и 6 септември, а потоа гостуваат во Колумбија на 10 септември.