Вестбрук по соборениот рекорд на Чемберлен: Нема играч како мене

Составот на Вашингтон Визардс по една вистинска драма загуби од Сан Антонио Спарс со 146-143, но резултатот падна во втор план поради Расел Вестбрук.

Плејмејкерот на Визардс реализираше 22 поени, 13 скокови и 14 асистенции со што дојде до 175. „трипл-дабл“ во кариерата. Ова за него беше 12. „трипл-дабл“ во април со што го собори рекордот на славниот Вилт Чембрлен (1968 година) за најмногу вакви учиноци во период од еден месец.

Многумина аналитичари, навивачи, љубители на кошарката го обвинуваат популарниот Рас дека брка статистика, а тој конечно се огласи и одлучи да им одговори.

-Верувам дека нема играч како мене. Ако другите можеа да го прават она што јас го правам, сигурно тоа ќе го направеа. Сакам да имам влијание на секој натпревар што го играм, во секој сегмент.

-Не ми е гајле што велат луѓето за мене, не ми е важно што мислат и што велат дека јас само бркам статистика. Интересно е што велат дека сè што правам не е корисно. Така не говореа кога стануваше збор за Меџик Џонсон или Оскар Робертсон. Се чини оти е лесно, ама не е, -порача ѕвездата на Вашингтон.