Вардар застана кога беше најпотребно, Пик Сегед ги однесе бодовите од Скопје

Ракометарите на Вардар го претрпеа четвртиот пораз во низа во Лигата на шампионите и тоа во пресметката против Пик Сегед кој оваа вечер славеше во СЦ „Јане Сандански“ со 28-26.

„Црвено-црните“ можат да жалат што не победија или пак што не освоија минимум еден бод затоа што во поголемиот дел од натпреварот водеа и имаа контрола на резултатот. Вардарци успешно го решија првиот дел и на пауза заминаат со 15-13, водство кое во продолжението го зголемија и во неколки наврати имаа плус три во второто полувреме.

Меѓутоа при водство на Вардар од 20-17 гостите од Унгарија направија серија од 3-0 и дојдоа до 20-20, па од тука се сменија работите, порасна самодовербата кај играчите на Пик Сегед, плус вардарци промашија неколку пенали и во ваков тесен натпревар токму тие детали одлучија избраниците на Пастор да слават во Скопје.

Дибиров и Јотиќ со по шест гола беа најефикасни кај македонскиот претставник, исто толку на спротивната страна дадоа Банхиди и Радивојевиќ.

Вардар во следниот меч гостува во Унгарија кај вечерашниот натпревар.