ВАР системот ќе функционира за мечот Македонија – Косово

Македонија и Косово на 8 октомври (20:45 часот) ќе го одиграат мечот од полуфиналето во Лигата на нации за пласман на Европското првенство, средба на која ќе фунционира ВАР системот.

Ова е последната информација која ја објави Фудбалската федерација на Македнија која посочи дека на Националната арена ќе се имплементира ВАР системот, видео технологија која се користи како помош при судиските одлуки.

За да се користи т.н. ВАР систем на одреден стадион потребно е да се направи тест за одобрување дека видео технологијата може да се користи. Одобрувањето за користење на ВАР систем го потврдува ФИФА, а сето тоа е поврзано со Правилата на фудбалската игра.

На Националната арена „Тодор Проески“ ќе се изврши тестирање за користење на ВАР технологијата на ден пред натпреварот со Косово по претходен состанок на кои ќе присуствуваат претставници на Фудбалската федерација на Македонија, одговорните за ВАР системот за натпреварот Македонија – Косово и претставник на компанијата „HAWKEYE“ која што УЕФА ја има избрано за официјална компанија за имплементација на ВАР систем на натпреварувања организирани од УЕФА.

На самиот ден на натпреварот ќе се направи тест за синхронизирање (опрема на стадион со ВАР возило), а последното тестирање ќе се изврши на два часа пред почетокот на натпреварот.

Доколку има одредени технички проблеми со имплементацијата на ВАР системот за време на натпреварот, во тој случај видео асистенцијата за помош при судиските одлуки нема да се користи.