Селекторот Ангеловски остана без двајца играчи пред гостувањето во Грузија

Македонската фудбалска репрезентација вчера успешно го положи првиот испит во новото издание на Лигата на нации, натпрвар на кој Игор Ангеловски за жал успеа да загуби еден од стартерите во пресрет на втората пресметка која следи, гостувањето во Тбилиси.

Кире Ристевски го заврши со повреда вчерашниот меч против Ерменија во Скопје, па сега нема да му стои на располагање на селекторот Ангеловски за натпреварот против Грузија.

Дефанзивецот има истегнување на десниот бутен мускул и ќе мора да паузира извесно време, а од Федерацијата соопштија дека за дуелот со Грузијците отпаѓа уште едно име.

Иако се очекуваше Иван Тричковски да заздрави и да ја залечи повредата поради која го пропушти вчерашниот меч, на денешниот последен тренинг пред пресметката со Грузија стана јасно дека нема да може да отпатува за Тбилиси.

Напаѓачот има хематом на левата натколеница и овој септемвриски репрезентативен циклус за жал ќе го заврши без минутажа на теренот.