Салихамиџиќ го договори Нагелсман, па ја искоментира работата на Флик

Хасан Салихамиџиќ на крајот ја преживеа и ја доби интерната „војна“ со Ханси Флик, па при објавувањето на веста дека Јулијан Нагелсман и официјално ќе биде нов тренер на Баерн Минхен, популарниот Брацо излезе со коментар за работата на се уште актуелниот тренер.

Салихамиџиќ како спортски директор на тимот учествувал и во преговорите за ангажман на талентираниот и перспективен 33-годишен стручњак, но покрај тоа што очекува забавна соработка со новиот тренер, имаше коректни зборови и заработат на Флик кој испиша историја како тренер на Баерн.

– Преговорите со Јулијан беа многу кооперативни, многу брзи и конструктивни. Од тоа што веќе го видов, сигурен сум дека ќе имаме многу забава со него како тренер, – изјави Брацо, кој потоа се насочи кон Флик.

– Сакам да му искажам огромна благодарност на Ханси Флик. Откако ја презема функцијата прв тренер пред една и пол година, заедно прославивме толку многу победи и титули.

– Тројната круна во 2020-та година за мене е хајлајт на неговата работа во Баерн. Овој успех е историја, секогаш ќе стои зад неговото име и никој не може да го поништи. Му посакувам се најдобро во иднина, – вели Брацо.