РК Бутел верува во стабилниот проект: Кузманоски ја продолжи верноста со нов договор

РК Бутел повторно е дел од плејоф разигрувањето во Суперлигата и продолжува со позитивниот континуитет кој го наметна, а најзаслужен за тоа во последно време е Горан Кузманоски.

Во својата втора сезона во скопскиот клуб, Кузманоски повторно ги задоволи апетитите на водечките луѓе на клубот, па денеска беше награден со нов двегодишен договор, според кој ќе остане во Бутел до 2027-ма година.

Концептот на клубот останува ист како и досега, односно се оди на промоција и форсирање на млади македонски ракометари, како и по некој искусен и странски ракометар на дефицитарните позиции.

– Ќе се потпираме пред сѐ на македонски ракометари, особено на млади играчи кои се иднината на нашиот клуб и на македонскиот ракомет воопшто. Ќе се засилиме со најмногу двајца странски играчи, но само на позиции каде што моментално немаме соодветни домашни решенија.

– Нашите младински категории веќе подолго време покажуваат сериозен квалитет – бевме кадетски шампиони, а сега младинците завршија на високо трето место. Тоа е доказ дека системски се работи и дека талентот е тука. Нашата амбиција останува иста – и во следните две сезони сакаме да бидеме дел од плеј-офот и да продолжиме со развој на еден стабилен и конкурентен тим, – изјави Кузманоски.