Реал со „стотка“ против Баерн, Фенер во Тел Авив ја прекина лошата резултатска серија (ВИДЕО)

Кошаркарите на Реал Мадрид ја остварија втората сезонска победа во Евролигата и тоа против тимот на Баерн Минхен кого го совладаа на домашен терен со 100-82.

Домаќините беа решени да ги „избришат“ неуспесите против Милано и Барселона, односно да се вратат на победнички патеки, цел која успеаа да ја исполнат со квалитетна игра од почетокот до крајот.

Пет играчи на „кралевите“ беа двоцифрени, Керол беше лидер со 19 кошеви, додека Томпкинс застана на 16 поени и собра 7 скокови.

Фенербахче пак ја прекина серијата од три порази и тоа во Тел Авив кај Макаби. Турскиот тим одигра одлично во вториот дел, направи пресврт и се радуваше на триумф од 75-65.

Мухамед и Де Коло искомбинираа 30 поени и со тоа ја поништија одличната партија на Вилбекин кој реализираше 23 кошеви на спротивната страна.

На останатите два меча, ЦСКА Москва ја надигра Валенсија со 84-75, додека литвански Жалгирис како гостин славеше над Асвел со 83-74.