Проблеми за Македонија: Милевски остана без Младеновски, виси и Руфати

Македонската репрезентација до 21 година ја очкеува дуел со Фарски Острови во квалификациите за Европското првенство, дуел за кој селекторот Благоја Милевски нема да може да смета на неколку играчи.

Од претходно беше познато дека капитенот Давор Здравковски поради жолти картони ќе мора да го скокне овој натпревар, но тој не е единствениот кој ќе недостасува затоа што Марио Младеновски поради повреда исто ќе биде во „аут“, додека виси и Агрон Руфати кој заработи расекотина на аркадата против Шпанија.

–Се соочуваме со одредени проблеми поради повреди на некои фудбалери, но тоа е нешто што мораме да го прифатиме. Овој дуел ќе биде сосема поразличен во однос на натпреварот со Шпанија, но и нова можност за играчите да го потврдат својот квалитет и потенцијал. Покажавме дека можеме да се спротивставиме на најдобрите и тоа ни дава за право сеуште да веруваме во добар пласман во групата. Сега ситуацијата е поинаква, противникот иста така, но останува обврската да одиграме најдобро што можеме и секако да се однесуваме дисциплинирано и професионално во играта и нашиот однос. Верувам во фудбалерите и се надевам на многу позитивни работи на утрешниот натпревар, -истакна Милевски.

Дуелот Фарски Острови-Македонија се игра утре од 15 часот.