Познат е првиот финалист: Алкарас ќе ја брани титулата на Ролан Гарос

Најдобриот шпански тенисер, Карлос Алкарас обезбеди пласман во финалето на Ролан Гарос каде ќе ја брани титулата со подобриот од пресметката меѓу Јаник Синер и Новак Ѓоковиќ која е на програмата од 19 часот.

Алкарас во денешното полуфинале беше подобар од Лоренцо Музети или поточно Италијанецот се одлучи да го предаде мечот при негатива од 2-1 од сетови и водство на Карлос од 2-0 во гејмови во четвртата „рунда“.

Музети имаше одличен почеток и првиот сет го доби со 6-4, потоа во вториот Алкарас двапати доаѓаше до брејк, ама експресно ја губеше предноста по што се играше тај-брејк во кој фаворитот беше на повисоко ниво со 7-3.

Од тука Карлитос почна да доминира и славеше со 6-0 во третиот сет каде Лоренцо беше се пожали на повреди и беше јасно дека не може да го покаже најдоброто од себе, издржа уште два гејма во четвртиот и реши да се повлече и да му ја честита победа на противникот.

Со ова Алкарас стана петтиот најмлад играч кој успеал да дојде до пет грен слем финалиња во Опен ерата и само трет активен машки тенисер со ваков учинок по Новак Ѓоковиќ и Данил Медведев.