Панатинаикос го одбрани домашниот терен и стана последен патник на завршниот турнир

Барселона и Анадолу Ефес се изборија за мајсторки во четвртфиналните серии во Евролигата, но денеска немаа сили да комплетираат целосен пресврт за пласман на Ф4.

Последните два билети за завршниот турнир во Евролигата сепак им припаѓаат на Монако и Панатинаикос, екипи кои на крајот профитираа од тоа што ги играа „мајсторките“ на домашен терен.

Монако победи во инфаркт завршница со Барселона со резултат 85:84, додека Панатинаикос беше доста посигурен и не трепереше за победа до последната секунда.

Грчкиот великан останува во игра за одбрана на тронот во европската кошарка, пред се благодарение на НБА засилувањето Џеди Осман.

Турчинот направи голема разлика на денешниот меч со 28 поени зад своето име, а тоа беше доволно добра мотивација за домашниот тим да оствари победа со резултат 75:67.

ПАО на овој начин го комплетираше кругот од четири екипи на фајналфор турнирот во Евролигата, односно им се приклучи на Фенербахче, Олимпијакос и Монако.