Младите го освоија Торшавн за трета победа во квалификациите за ЕП

Македонската репрезентација до 21 година славеше над Фарски Острови со 2-1 во шестиот меч од квалификациите за Европското првенство.

Ова за избраниците на Благоја Милевски беше втор гостински триумф во овој циклус, а до истиот во Торшавн дојдоа откако ги надиграа домашните фудбалери кои да потсетиме во претходното коло направија големо изненадување и го победија Израел со 3-1.

Нашите надежи искористија две од своите шанси, првата во 16 минута кога Ристовски биеше прецизно, додека пак другата беше во 80 кога на вистинското место се најде „резервистот“ Ацковски.

Домаќините до крајот постигнаа почесен гол и тоа преку Кнудсен во 84. минута.

Македонија сега има 10 бода што е доволно за второ место во групата 6 зад селекцијата на Шпанија која има 16 поени. Следниот натпревар за момците на Милевски е наредниот месец против Казахстан на гостински терен.