Македонија потешко од очекувањата против Финска, го дофативме и седмото Европско првенство

Ракометната репрезентација на Македонија забележа очекувана победа против Финска изразена со пет голови разлика (22:27).

Избраниците на Кире Лазаров одиграа под своите можности, но на крајот успеаја да ги освојат планираните бодови против Финска и со тоа и математички да се пласираат на ново Европско првенство кое ќе се игра во Словачка и Унгарија.

Лазаров натпреварот го почна со млади сили, а практично првиот тим мораше да влегува уште во 15. минута затоа што Финците играа одлична одбрана и континуирано беа во водство. Домашниот тим беше подобар противник во првото полувреме кое на крај заслужено го доби со 14:12.

Второто полувреме започна исто како и првото, со блага предност на Финска која во одреден момент доаѓаше и до три голови предност.

Сепак, нашите ракометари се разбудија по 40. минута и ја презедоа контролата на играта, па на крај стигнаа и до посакуваната победа.

Вреди да се напомене дека голманот на Финска, Росландер ни ги зададенајголемите проблеми и беше непремостлив бедем за македонските ракометари. Росландер натпреварот го заврши со вкупно 20 одбрани, а многу од нив беа од чисти зицери или одбранети пенали.

И во нашиот табор светла точка беа голманите Томовски и Митревски кои собраа 15 интервенции. Томовски одбрани седум удари, додека Митревски кој бранеше во второто полувреме осум пати ги спречи противниците да ја погодат нашата мрежа.

Кирил Лазаров и Филип Кузмановски беа најефикасни поединци во нашиот табор со по пет постигнати голови, додека во редовите на Финска одличен беше Гранлуд со шест погодоци.

Следниот натпревар за нашата репрезентација е веќе во недела кога во Скопје ќе ја дочекаме Швајцарија во последниот натпревар од квалификациите за континенталниот собир.