Македонските младинци запишаа прва победа на Европското првенство во Ерменија

Македонската кошаркарска репрезентацоја до 20 години имаше „трета среќа“ на Европското првенство од Б дивизијата кое се игра во Ерменија, откако ова попладне успеаја да извојуваат прва победа на овој турнир.

Нашите надежи пронајдоа рамноправен ривал во третото коло и успеаја да го диктираат темпото од почето до крај, па сосема заслужено забележаа прв триумф и освоија први бодови.

Македонија славеше против Грузија со резултат 92:84, но победата ниту еднаш не беше доведена во прашање, бидејќи црвено-жолтите на полувреме имаа предност од 56:35.

Грузијците во вториот дел успеаја да се изборат само за подостоен пораз, што е вкупно втор за нив на натпреварувањето во Ерменија.

Исто толку порази има и нашиот национален тим, бидејќи пред денешната победа, претрпевме два неуспеси во дуелите со Холандија и Австрија.