Класата е вечна: Агуеро со мајсторски погодок му донесе победа на Сити (Видео)

Пеп Гвардиола одмори огромен дел од стартерите против ПСЖ, но дури и во таква ситуација, располага со тим кој може комотно да сее страв во Премиер лигата, натпреварување во кое сега се практично пред освојување на трофејот по најновата победа.

Шпанскиот стручњак му даде шанса од првата минута на Кун Агуеро во пресметката со Кристал Палас, а искусниот аргентински голгетер ја покажа цела своја класа, па со МВП издание на „Селхрт парк“, докажа дека има уште многу што да понуди во фудбалот, без оглед на тоа што си заминува од Сити.

Гостите од Манчестер доста се мачеа во првото полувреме, но на стартот на вторио дел, набрзина го решија прашањето околу победникот, па веќе утре може да бидат нови шампиони на Англија доколку Јунајтед не победи во дербито со Ливерпул.

Агуеро изрежира мајсторија во 57-та минута за водство од 0:1, откако со приемот си ја намести топката за полу-волеј, а потоа со маестрална голгетерска завршница испрати неодбранлив удар.

Две минути по погодокот на Кун, Феран Торес стрелаше за 0:2, а во тој момент стана јасно дека Сити ја осигура победата со половина сили, без да потроши голем дел од играчите кои беа стартери против ПСЖ.