Итудис: Евролига го губи натпреварувачкото значење и чувството за правичност

Еден од најдобрите тренери во Европа и предводник на ЦСКА Москва, Димитрис Итудис даде свој коментар за новите случувања во Евролигата.

Најсилното клупско натпреварување на стариот континент од коло во коло има се повеќе проблеми со заразени играчи од КОВИД-19, се одложуваат мечеви, се доделуваат службени победи што секако предизвикува револт кај актерите, но и клубовите кои имаат вложено сериозни финансиски средства.

-Ситуацијата станува се полоша и полоша. На Химки му фалат здрави кошаркари. Зенит воопшто не отпатува, не знам што ќе се случи со нив. Асвел исто така има многу инфицирани случаи. Ние имаме четири такви случаи, уште повеќе во ЦСКА Б…Можам да споменам и други клубови со кои игравме како Барселона и останатите, ама јас сум само тренер. Верувајте ми, Евролига го губи натпреварувачкото значење, чувството за правичност и за активност, -истакна Итудис.