Ѓоковиќ смета дека заслужува призание: Сакам да доживеам нешто слично како Надал

Рафаел Надал доживеа неверојатна почит и чест од организаторите на Ролан Гарос и беше испратен од „Филип Шатрие“ како најголем шампион во историјата на Френч Опен, па покрај овациите и трофејот за заслуга кој го доби за време на церемонијата, Шпанецот на централниот терен доби и уникатна плакета која ќе остане врежана во земјата засекогаш.

Поради 14-те освоени титули на тенискиот грен слем во Франција, Надал доби чест каква што навистина заслужува, а во ситуација кога целиот настан одблиску го следеше и Новак Ѓоковиќ, во мислите на Србинот се разбуди една интересна идеја.

Ноле на новинарите им откри дека добил интересно размислување од членовите на неговиот тим, кои сметаат дека и тој заслужува признание како ова што го доби Надал, но од организаторите на Аустралијан Опен каде Србинот е десеткратен шампион.

– Неколку членови од мојот тим ја споменаа таа идеја по церемонијата за Надал, сметаат дека Аустралијан Опен треба да се докаже и покаже како што тоа го направи Ролан Гарос.

– Јас немам некои очекувања, искрено тоа е мисла на мојот тим, но секако дека би сакал да доживеам нешто слично. Поготово би сакал во Австралија, но и на сите останати грен слем турнири каде оставив трага. Би сакал да ми се покаже почит за се што направив за тенисот, а дали ќе дојде до такво нешто навистина не знам, – изјави Ѓоковиќ.