Фленсбург издоминира во финалето и ја одбрани титулата во Европската лига на ЕХФ

Фленсбург ја одбрани честа на Германците и успеа да излезе како победник во големото финале на Европската лига на ЕХФ, натпреварување кое својот завршен чин го имаше вечерва во Хамбург.

Фајнал-фор турнирот во германскиот град заврши со победа на Фленсбург на завршниот меч, и тоа во пресметка која беше едносмерна од почетокот до самиот крај.

Монпелје успеваше да има минимална предност само во првите седум напади и последно водеше со 4:3, по што почна доминација на Германците кои ги преземаа работите во свои раце.

Ракометарите на Фленсбург се наметнаа со агресивниот пристап во одбрана и во напад и брзо се одлепија на плус шест, па веќе до крајот на полувреме стана јасно дека Французите ќе имаат пеколно тешка задача во Хамбург.

Вториот дел не донесе ништо поинакво и продолжи доминантната игра на Фленсбург, при што највисоката предност беше онаа од 31:21 на неколку минути пред крајот.

Во самата завршница, очекувано имаше мало опуштање и Монплеје се избори за малку подостоен пораз од 32:25, но тоа не спречи да видиме германско славје и освоена титула за Фленсбург, втораво низа по онаа минатата година.

Претходно се одигра и „малото финале“ во Европската лига, а во германската пресметка Кил беше подобар од Мелсунген со 37:31 и го освои бронзениот медал.