Фабрегас може да здивне: Реал сепак нема да го активира правото на откуп за откровението во Серија А

Нико Паз беше откровение на сезоната во Серија А и убедливо најдобар и најопасен играч на Комо, па поради сериозниот раст кој го забележа во италијанската елита, на почетокот на месец јуни се доби впечаток дека Реал Мадрид ќе ја активира опцијата за откуп.

„Кралскиот клуб“ пред една година го продаде Аргентинецот на Комо и си задржа право во период од неколку години да има ексклузивно право за враќање на офанзивниот фудбалер, но последните информации се дека тоа нема да се случи ова лето.

Реал за само 8 милиони евра можеше да го врати Нико Паз, но сега Комо официјално бил известен дека најдобро за играчот ќе биде да остане дел од актуелната средина.

Паз воодушеви под водство на Сеск Фабрегас и се прикажа како еден од најталентираните играчи за врска во овој момент, а во ситуација кога не би имал загарантирано место во стартната постава на Чаби Алонсо, нелогично и нефер би било да се сопре неговиот налет.

Во Реал Мадрид сметаат дека најдобро место за Нико во овој момент е Комо, клуб кој ќе има многу поамбициозен проект во новата сезона, во која се очекува тимот на Фабре да брка и излез во Европа.