Еве што ја чека Македонија: Хрватските новинари со први информации за „безбедносната тортура“ во Египет!

Утринава од Загреб со заеднички авион за Египет отпатуваа селекциите на Хрватска  и Словенија, a според првите извештаи, по пристигнувањето се соочиле со строгите безбедносни протоколи за влез во земјата.

Избраниците на Лино Червар имале „антигенско тестирање“ во автобус на аеродромската писта „Борг Ел Араб“, па откако тие резултати покажале дека сите играчи и членови на стручниот штаб се негативни, им било дозволено да продолжат до хотелот „Толип“ под силна полициска и воена присмотра. Шок за хрватските репрезентативци бил фактот дека хотелот е оддалечен 80 километри од Александрија и од салата во која ќе се играат натпреварите.

Веднаш по пристигнувањето во хотелот, било направено ново, овој пат ПЦР тестирање, а репрезентативците добиле стриктна забрана да излегуваат од собите. Во 20 часот по локално време, тие се уште ги чекале резултатите од тестовите и не можеле да одат ниту на вечера!

Овие информации ги споделија хрватските новинари, а ги потврди и порталот на телевизијата „Спортклуб“.

Македонија ќе патува утре, најверојатно во попладневните часови. На скопскиот аеродром за утре има најавени четири лета, но два се за Истанбул, а по еден за Виена и Цирих, што веројатно е показател дека се уште трае процесот на договарање на патувањето.

Македонскиот селектор Данило Брестовац, денеска објави кои 20 ракометари ги повикал за мундијалот во Египет.