Арбелоа откри како бил „поздравен“ од Мурињо со говор за легендарниот Кафу

Алваро Арбелоа како дете на школата на Реал Мадрид доби втора шанса да успее на „Сантијаго Бернабеу“, и тоа откако успеа да се етаблира како фантастичен дефанзивец преку Депортиво Ла Коруња и Ливерпул.

Десниот бек посебно брилјираше во Ливерпул од каде се врати во шпанската престолнина, а потоа како член на матичнит клуб освои се што можеше да се освои.

Арбелоа е еден од фудбалерите кои посебно го потенцираат човечкиот квалитет на Мурињо и ужива да се потсетува на времето минато со португалскиот стручњак, па сега сподели и една анегдота која до денесна не беше позната за јавноста.

– Се сеќавам дека игравме против Севилја. Обично во првото полувреме играв на страната на која што е Мурињо крај линијата, но овојпат беше обратно. Кога играте далеку од тренерот, знаете да се занесете. Отидов напред шест или седум пати и на полувремето говорот беше посветен на мене: Денеска го имаме Кафу во тимот, каде ли оди Кафу напред толку пати? Ми стави јасно до знаење дека не сака такви излети, – му откри Арбелоа на јутјуберот Валенти Санхуан.

– Сум кажал и претходно. Јас сум голем фан на тренерот Мурињо, но поголем фан сум на Жозе. Тој ми е пријател, го сметам за близок. Научив многу од него, уживав и работев како животно, но и се смеев на сите работи кои ги минавме заедно, – додава Алваро.