Алкалоид ќе им ги рефундира парите на фановите кои останаа покуси за ракометен спектакл во „Борис Трајковски“

Алкалоид испрати низа соопштение за да и се заблагодари на многубројната публика и да изрази жалење за несудениот ракометен спектакл во „БориС Трајковски“, а додека целата разврска од скандалот кој го предизвикаа Грците треба да го решава ЕХФ, клубот од Автокоманда испрати порака до сите оние фанови кои вчера останаа покуси за европско финале.

Ланскиот освојувач на Купот на Македонија најави дека ќе бидат рефундирани сите парични средства на навивачите кои купија билети за вчерашниот натпревар, а тоа ќе се направи во период од 15 дена.

– Почитувана публико, Уште еднаш ја изразуваме нашата БЛАГОДАРНОСТ што ни дадовте безрезервна поддршка и што во голем број дојдовте во СЦ „Борис Трајковски“ на финалниот меч од Европската лига на ЕХФ. Жалиме што натпреварот не се одигра затоа што гостинскиот состав не сакаше да излезе на теренот и спортски да се бори за пехарот од ова натпреварување.

– Вашите билети купени онлајн ќе бидат рефундирани во период од 15 работни дена. Средствата ќе ги добиете директно на вашата сметка преку која сте ги купиле билетите. Билетите што се купени од продажно место ќе можат да бидат рефундирани од местото на купување со приложување на соодветната фискална сметка и на билетот.

– Уште еднаш ви се заблагодаруваме за континуираната поддршка и трпение. Се надеваме дека заедно ќе славиме нови успеси во иднина. Со почит, Ракометен клуб Алкалоид, – гласи објавата.