Видерер ќе брка трет претседателски мандат во Европската ракометна федерација

Европската ракометна федерација во септември ќе бира претседател, а актуелниот Михаел Видерер посакува да добие поддршка и за трет мандат.

69-годишниот Австриец испратил официјално писмо до сите европски национални федерации и ги известил дека планира да се кандидира за трет манд и посакува нивна поддршка за такво нешто.

Гласањето на делегатите ќе биде дел од програмата на конгресот на ЕХФ кој ќе се одржи на 19 и 20. септември во Андау, Австрија.

– Имајќи ја предвид севкупната ситуација и задачите и обврските што претстојат, многу сум мотивиран да го водам Извршниот комитет на Европската ракометна федерација во следниот изборен период, заедно со претставниците, кои вие – Националните федерации – ги избирате на различни функции на спортско-политичко и техничко ниво, – вели Видерер.

Видерер дојде на функцијата во 2016 година и го наследи Французинот Жан Брио, а пет години подоцна доби поддршка и за втор мандат. Претходно, Австриецот беше генерален секретар на ЕХФ од 1992 до 2016 година.